Dae s’autonomismu a s’indipendentismu: idea crara o oportunismu?

diegu.jpg

A bos l’ammentades chi, deretu a pustis de sa segunda gherra, s’ùnicu partidu regionalista, chi tando si definiat autonomista, fiat su Partidu Sardu? Totu sos partidos chi fiant intrados, tando, a Sardigna, fiant antiautonomistas. B’aiat chertu s’interventu de Togliatti pro cunvertire de repente su PCI in “autonomista”. Gasi etotu aiant fatu sos àteros partidos. Sa “cunversione” fiat istada sa manera pro nche catzare fortza a un’idea chi si fiat ispainada. Sos partidos italianos si fiant apoderados de s’idea de autonomia pro la negare o pro l’indebilitare. E tando totus custos si fiant cambiados in “autonomistas”, finas ca custa visione polìtica regionalista non poniat in duda ne in perìgulu s’unidade de s’istadu italianu. Est craru finas chi su primu resurtadu de custa atzione tàtica de sos partidos italianos fiat istada chi su Partidu Sardu aiat pèrdidu su monopòliu de s’idea e, duncas, fortza. E s’autonomismu si fiat “diluidu” in una pretesa de càmbiu de s’istrutura amministrativa de s’istadu, comente cale si siat regione italiana. Difatis in s’istatutu sardu de su 48 non b’at perunu riferimentu a sa limba sarda comente limba de sos Sardos, sende chi in s’art. 6 de sa Costitutzione de s’istadu italianu de su 1947 fiat giai cunsiderada s’esistèntzia de minorias linguìsticas. De seguru sos polìticos sardos de tando pessaiant chi custu artìculu non fiat pro sa limba sarda e “pro” sos Sardos!

 

Oe, forsis, est capitende su matessi: sos partidos o fortzas polìticas chi timent s’idea natzionalista sarda e unu progetu de liberatzione indipendentista, in càmbiu de lu negare o de lu contrariare in manera aberta comente est capitadu finas a como, si sunt “cunvertende” in “indipendentistas”, macari in sa forma “soveranista” o in àteras formas chi ant a imbentare. Una cunversione bera o una manera de nche catzare fortza a un’idea de repùblica sarda pluriseculare? Pro cumprèndere si lis devimus dare fide, b’at a chèrrere unu programa craru, mìnimu, de prioridades istitutzionales chi càmbiet sa diretzione de custas fortzas: pro prima cosa sa sardizatzione prena organizativa de sas fortzas nàschidas in Roma; s’assuntzione de sa limba sarda comente motore de s’atzione interna e esterna de totu sas fortzas polìticas in Sardigna; sa ufitzializatzione de sa limba sarda in totu sos àmbitos e impreos sotziales e territoriales. A pustis s’at a bìdere chie bìest a beru e chie nono.

 

de Diegu Corràine

 

https://www.facebook.com/diegu.corraine#!/notes/diegu-corr%C3%A0ine/dae-sautonomismu-a-sindipendentismu-idea-crara-o-oportunismu/468546693175978

Dae s’autonomismu a s’indipendentismu: idea crara o oportunismu?ultima modifica: 2012-09-18T00:04:19+02:00da angelocanu76
Reposta per primo quest’articolo