Si sos italianos aboghinant contra a sa “pulizia linguistica”

minoranze linguistiche, legge provinciale bolzano, ettore tolomei, pdl, fli, piero giarda, ministero, costituzione, bilinguismo, lingua sarda


Si sos italianos aboghinant ca sos de Boltzano sunt faghende “pulizia linguistica” cheret nàrrere chi carchi cosa non torrat.
In su “Corriere della Sera” b’at un’artìculu chi murrungiat contra a sos tedescos de Boltzano, culpàbiles de àere aprovadu una leghe subra de sa toponomàstica chi at sa punna (custa puru culpàbile!) de cherrerret torrare a dare sos nùmenes in tedescu de logos…tedescos!
Sa cuntierra naschet in su 1923 cando s’”irredentista” Ettore Tolomei, beneditu dae su guvernu de Mussolini, ammanitzat unu Prontuario de nùmenes italianos de montes e de baddes, pro nde bogare sos nùmenes tedescos.
Sa lege provintziale nova naschet imbetzes totu cun un’ànimu diferente: su de dare “a una commissione paritetica composta dai 3 gruppi linguistici (italianu tedescu e ladinu, ndr) il compito di valutare i toponimi di monti, torrenti, malghe e frazioni“. Mancari custa lege siat mirende a su respetu de sas limbas e de sas popolatziones, su presidente de sa Provìntzia de Boltzano, Luis Durnwalder, est istadu acusadu de “pulizia linguistica”: su PDL e su FLI ant agiuntu chi sa lege est «Un grave passo indietro che rischia di portare alla scomparsa di tutti i toponimi della nostra lingua».
Sa chistione est arribada a su Parlamentu e su ministru pro sos Raportos cun su Parlamentu, Piero Giarda, at fatu cumprèndere, faeddende unu pagu in suspu, chi sa lege provintziale non podet fàghere a mancu de si cunfrontare cun su printzìpiu de bilinguismu apostivigadu dae sa Costitutzione. Nos at a tocare a bi l’ammentare, su matessi printzìpiu de sa Costitutzione, a su ministru e a sos partidos italianos, cando amus a faeddare de bilinguismu inoghe, ca paret chi si nde ammentent, si l’agradat a issos…


de Anzelu Canu


dae: http://salimbasarda.net/politica-linguistica/si-sos-italianos-aboghinant-contra-sa-pulizia-linguistica/


Si sos italianos aboghinant contra a sa “pulizia linguistica”ultima modifica: 2012-11-20T21:46:00+01:00da angelocanu76
Reposta per primo quest’articolo