Su sardu e sa limba vasca: unu paragone

de Davide Mulas MarciDavide Mulas MarciInsinnande istòria, geografia e cultura italiana in s’universidade de Szeged, cando bido chi in sos libros de geografia a sa Sardigna li dant unu logu parìvile che a San Marino (de sos de istòria, literatura e arte mancu a nde chistionare: sa Sardigna non b’est pròpiu), non mi potzo poderare de pònnere paragones cun sa polìtica de avaloramentu, chi faghet sa Comunidade Autònoma Vasca pro su logu suo.
Difatis, in sa CAV, chi est tota che pare cun una regione italiana a istatutu ispetziale, sende chi faghet a istudiare in vascu dae s’iscola de pitzinnia fintzas a s’universidade, sos giòvanos nche essint bilìngues (in euskera, ispagnolu, cun s’inglesu dae oto annos). Ma pro detzisione de su guvernu regionale, sa limba issoro, s’euskera (in pare cun istòria, cultura e literatura de sos Paises Vascos) l’insinnant in 34 universidades de 17 natziones: inoghe, in Ungheria, faghet a l’istudiare in s’universidade de Budapest e in sa de Szeged. A fitianu sos letores sunt finas dotzentes de ispagnolu. In prus sa CAV, ponende•nche•bi dinare, adderetat sas 65 „domos vascas”, iscolas de limba e tzentros culturales ispartzinados in 15 natziones, e sos 76 euskaltegis chi sunt iscolas de limba vasca pro gente manna in totu Euskal Herria (CAV, Ispagna e Fràntzia). In s’universidade de Reno, Nevada, b’est su Centre for Basque Studies e, last but not least in internet bi sunt a disponimentu a su nessi 7 cursos on line pro de badas.
At a èssere pro custu chi non mi so ispantadu nudda cando unu collega m’at nadu „a l’ischis, so istadu medas bortas in Sardigna, ma no ischia chi tenides unu connotu gai bellu de cuncordu: l’apo bidu in unu documentàriu de sa tv isvìtzera”? Ma in logu nostru sos chi „cess… ite grezzu chi ses a allegare in sardu, su nasu a nche l’ant postu mai a foras de Itàlia? Mi’, petzi pro li donarent un’ograda a comente est in aterue e, chissae, pro si nche dimandarent cantu balent in s’economia e in su turismu sa limba e sa cultura vasca, e cantu pesat intames su sardu in Sardigna.
Ah, casi mi nde fia ismentighende: cras est su tres de Nadale, sa Die de sa Limba Vasca
Li torro gràtzias a s’amigu Oxel Uribe-Etxebarria, letore de euskera in Szeged, chi li depo cumbidare unu brocale de birra ca amus fatu a cambiapare cun sas informatziones.

Su sardu e sa limba vasca: unu paragoneultima modifica: 2014-12-02T23:18:04+01:00da angelocanu76
Reposta per primo quest’articolo

Lascia un commento