Una manu de agiudu a sa Sardigna – 7 de su mese de Idas 2013

Sòtziu Sardos de Bartzellona

Sòtziu Sardos de Bartzellona

Sa die colada 18 de Onniasantu unu tziclone at atropelliadu sa Sardigna, lassende·si in palas dannos incalculàbiles e cajonende sa morte de 17 persones.
S’Assòtziu de sos Sardos in Catalugna, paris cun s’Assòtziu AltraItalia, s’Assòtziu Cose di Amilcare e cun su Zibaldone – Radio Contrabanda 91.4 FM, s’Associació de Músics Metròpolis e s’apoju de s’Assòtziu +39, ammaniat un’eventu de solidariedade, chi sos balàngios s’ant a intregare pro sa recostrutzione e donados a siendas e famìlias vìtimas de su disacatu.
Sàbadu 7 de su Mese de Idas moende dae sas 5 de a merie in su tzentru sòtziu-culturale Sant Pere Apòstol, Carrer de Sant Pere Més Alt 25, sa generosidade de medas artistas dae meda alas de su mundu ant a animare un’ispetàculu chi at a intretènnere mannos e pipios. Un’atòbiu intre teatru, tzircu, dantza, pintura e mùsica pro torrare s’ispera a sa Terra nostra ferta. S’acontèssia est aparitzada in su matessi tempus cun sas tzitades de Londra e Bruxelles. Sos fundos regortos s’ant a donare dae sas tres delegatziones in sas festas de Pasca de Nadale a un’assòtziu chi òperat in su territòriu.
Intrada: 5€ (de badas pro minores de 12 annos)
Consumatziones: 1.5€

 

dae http://www.assotziusardos.cat/2013/11/29/unagiudu-pro-sa-sardigna-7-de-su-mese-de-idas-2013/

Su donu de sos Sardos pro sos Sardos

IMG_8621

Su chi b’at capitende in Sardigna sa dies a pustis de sa falada de sa prena de su 18 de santandria, nos mustrat su sentidu de sos Sardos, unu pòpulu chi rugrat s’ischina pro iscontriare su disacatu prus mannu de s’istòria sua. Sena lamentas, sena irrocos, sena ghèmidas isteniosas e mescamente sena prantos , si non pro sos mortos. Boghende a campu s’ànimu de chie ischit chi in sa bida niunu ti donat nudda e s’idea de chie ischit chi su chi b’at si l’at balangiadu a sa sola.

Ma in custas dies amus fintzas bidu sa solidariedade de sos Sardos pro sos Sardos, una paradura moderna pro torrare in sestu sa bida male iscontzada de gente traballadora incapada in sa mala sorte. Incapada in una disaura prus manna de issa! Alimentos, abba, bistires, meighinas, foràgiu, mangimes pro animales, trastos, suore, fortzas e dies de traballu: sunt sos donos fatos dae sos Sardos pro sos Sardos.

Custas dies amus bidu una Natzione pesende.si a pustis esseret ruta, a sa sola, sena agiudu perunu: chi nos siat de ammentu pro su tempus benidore, pro chi siat su donu nostru pro nois matessi.