Oco die chi ses de afestare

Petzi bi cheret una festa manna

De unu pòpulu chi s’est postu a banna

Nara Sardigna it as de ti bantare

Osserva, ma a uve cheres leare

Arressa in su pennente, prus no annas

E si icas passu est fàtzile chi irbannas

e prus non bales a ti n’abitzare

osserva a fitzos tuos emigratos

patian inoche chene travagliare.

Abaita a quirra, e poneti a ballare

Non bides sos pastores arrennegatos?

Sos montes de tzimentu carragliatos

E lacrimas de mama a los abare.

Che a cuss’aprile est ora de si pesare

Ca peus de tanno semus cumbinatos.

Jorgi Rusta (2011)