Su 2 de cabudanni de su 2012 in sa crèsia de su Rimèdiu in Orosei: Paràulas de Gràssia

 

relazione finale, paraulas de gràtzia, orosei, ufitziu de sa limba sarda, angelo canu

relazione finale,paraulas de gràtzia,orosei,ufitziu de sa limba sarda,angelo canu

 

Su 2 de cabudanni de su 2012 sa crèsia de su Rimèdiu de Orosei at istrangiadu sa manifestatzione “Paràulas de Gràssia” ammanitzada dae s’Ufìtziu de sa Limba Sarda, cun s’agiudu de s’assessoradu a sa Cultura, de s’Ufìtziu Tècnicu, de sos priores de sa festa de su Rimèdiu, de Maria Fara e Letizia Beccari e de su Cuncordu Urisè.

 

Pro sos chentu annos de sa publicatzione ” Canne al vento” si sunt bortados cantos de su romanzu in ue si faeddat de Orosei e de sa festa de su Rimèdiu. Amus isseberadu de cramare custa manifestatzione “Paràulas de Gràssia” ca est unu giogu de paràulas chi ponet ligàmenes intre de su nùmene de s’iscridora Gràtzia Deledda e sa paràula ” gràssia” chi est una genia de miràculu, unu donu chi Deus e santos faghent a chie los invocat. Cunforma sa dotrina catòlica est fintzas su èssere in amistade e in paghe cun Deus. E tando, non b’aiat mègius logu si non sa crèsia de su Rimèdiu pro allegare de paràulas de gràssia, fintzas pro more chi Gràtzia Deledda in su romanzu ” Canne al vento”, alleghende de Orosei, iscriet pròpiu de custa crèsia e pro more chi pròpiu in cussas dies incumentzaiat sa festa de su Rimèdiu.

 

Sa presentada de sa manifestatzione est istada fata dae sa diretora de s’ULS Mariantonietta Piga, mentres prof. Michele Pinna, faghende un’istèrrida subra de sa figura de Gràtzia Deledda pro sa literadura italiana e pro cussa sarda, at allegadu subra de s’importu chi aeret tènnidu custu romanzu si fiat istadu iscritu in sardu, pro sa limba sarda matessi.

 

A pustis de prof. Michele Pinna at faeddatu Giorgio Rusta, isprichende pro ite at isseberadu de sonare bator cantzones cantadas dae Andrea Parodi: unu donu pro s’ammentu suo. Sos operadores de s’Ufìtziu de sa Limba Sarda, Angelo Canu, Mariantonietta Piga, Gianfranca Selis, Giovanna Chessa, Valentina Schirru, Sara Nieddu, Mario Antioco Sanna e Ivan Marongiu, ant duncas lèghidu cantos de ” Canne al vento” bortados in sardu, cantos in ue si faeddat de sa crèsia de su Rimèdiu e de Orosei; sas leturas sunt istadas intramesadas dae sa mùsica de Giorgio Rusta e dae sas boghes de Letizia Beccari e Maria Fara, chi ant cantadu Astrolicamus, Armentos, Le memorie della musica (bortadu in sardu dae Giorgio Rusta) e Non poto reposare.

 

At cuncruidu sa serada su cuntzertu de su Cuncordu Urisè.

 

de Angelo Canu

 

pro isgarriare sa relata in pdf:

http://www.comune.orosei.nu.it/docs/cultura/15/relata_pro_paraulas_de_grassia.pdf

 

 

 

Paràulas de Gràssia

paràulas de gràssia.jpg

Sa Comuna de Orosei, paris cun S’Ufìtziu de sa Limba Sarda e s’Istitutu Bellieni de Tàtari presentant
PARÀULAS DE GRÀSSIA
OROSEI
Crèsia de su Rimèdiu
SU 2 DE CABUDANNI DE SU 2012 A SAS 21.30

PRO SOS 100 ANNOS DE SA PUBLICATZIONE DE
“CANNE AL VENTO”
SA BIDDA DE OROSEI AMMANITZAT UNA SERADA DE LETURAS PÙBLICAS

Ant a lèghere
Angelo Canu
Mariantonietta Piga
Gianfranca Selis
Valentina Schirru
Mario Antioco Sanna
Sara Nieddu
Giovanna Chessa
Ivan Marongiu
Michele Pinna

Intramesos musicales
At a sonare: Giorgio Rusta
Ant a cantare: Maria Fara e Letizia Beccari