Politicantes

Candidados novellos e antigos
cando su votu a s’eletore invocana
sas promissas che ràndine fiòcana
a nos naran cumpanzos e amigos.

Sempr’in sa propaganda sun prodìgos,
pius de su chi dana est su ch’iscròcana
e-i su setzidolzu che collòcana
in sa cadrea, a furia ‘e intrigos.

Cand’intran a bufare a calchi domo
sunu cumprimentosos e prolissos
e naran: «Si vitoria tenimos,

a bos ringratziare jà ch’enimos».
Ma nende gai naran intr’e issos:
«Jà nos bidimos a chimb’annos como».

Remundu Piras